නිවන් අවබෝධ කර ගැනීමට උපකාර වන්නේ පරම පවිත්‍ර සිරි සද්ධර්මයයි.

බුදු පියාණන් වහන්සේ පරම පවිත්‍ර සිරි සද්ධර්මය දේශනා කර වදාළේ සදාකාලිකව සැප සම්පත් විඳින දෙවියන් බ්‍රහ්මයන් සමූහයක් බිහි කරන්නට හෝ ධනවත්, බලවත්, නැණවත් මිනිසුන් සහිත ලෝකයක් ඇති කරන්නට හෝ නොවේ. දුක් විඳින දිළින්දන්ට සැප සම්පත් ලබාගන්නට මග පෙන්වා ඔවුන් සනසාලන්නට ද නොවේ. මේ උතුම් ධර්මය එවන් මතු ලබන සැප සම්පත් ගැන බලාපොරොත්තු ඇති කරවා රාගයෙන් මෝහයෙන් මිනිසුන් මුලාකරවන්නට දේශනා කළ එකක් නොව මිනිසත් බව ලැබූ මෙම ආත්ම භව දී ම ලබාගත හැකි, ලබාගත යුතු විමුක්තිය, නිදහස, නිවන ලබාදීමට මගපෙන්වීම සඳහාම ඉදිරිපත් කළ දහමකි. ලෞකික සැප සම්පත් යනු බිලී කොක්කක ඇමුණූ ඇමක්, මිරිඟුවක් මිස නියත වශයෙන් ඇති දෙයක් නොවන බව පෙන්වා දුන් දහමකි.

Wednesday, January 1, 2014

සං ගැන තවදුරටත්….

සං කියල කියන්නෙ එකතු කිරීම, අල්ලා ගැනීම, අයිතිකර ගැනීම, ගොඩගහගැනීම.  තවදුරටත් කිව්වොත් රාගයෙන් ද්වේශයෙන් මෝහයෙන් කටයුතු කිරීම යි. මේ නිසා සං උදය වෙනවා. ඒ කියන්නෙ සමුදය වීම. උදය කියල කියන්නෙ උපත ලැබීමක්. අපි කවුරුත් දන්නවා සම්මත වශයෙන් හැම දවසක්ම උපදින්නෙ උදයෙන් කියල. ඒ අනුව සමුදය කියන්නෙ සම්බන්ධයක් උපත ලැබීමයි. මෙතනදි සම්බන්ධ වෙන්නෙ රාගයෙන්, ද්වේශයෙන්, මෝහයෙන් නැත්නම් මානයෙන්. එතකොට මේ සම්බන්ධය ඇතිකරගන්නෙ පුද්ගලයෙකුගෙ කාය, වචනය හා මනස මගින්. මේ තුන්දොරින් ඇතිකරගන්නා සම්බන්ධය (සමුදය) නිසා කෙනෙකු සංසාරයට බැඳෙනවා.

සංසාරය

මේ සං තමයි, පෘතග්ජන මිනිසුන්ට සාර. ඒක තමයි “සංසාරයි” කියල කියන්නෙ. “අනේක ජාති සංසාරං” කියන්නෙ ඒකයි. බුදුහාමුදුරුවොත් බෝසත් කාලෙ හිතාගෙන හිටියෙ සං සාරයි කියල. හැබැයි බුදුවුනාට පස්සෙ තේරුණා මේක අසාරයි, නිස්සාරයි, අනාථයි කියල. “අසාරත්ථෙන අනාතං”. මේක තේරුම් ගත්තොත් මේ එකක්වත් උපාදානය කර ගනියි ද?

Monday, December 23, 2013

සං

සං යනු බුද්ධ දේශනාවේ වැදගත්ම වචනයයි. මෙය ශුද්ධ මාගධී වචනයකි. සං කියල කියන්නෙ කෙළෙස්වලටයි. ඒ කියන්නෙ රාගය, ද්වේශය, මෝහය. කෙටියෙන්ම කියනව නම් රාගයෙන් ද්වේෂයෙන් මෝහයෙන් සම්බන්ධතාවයක් ඇතිකර ගැනීම තමයි, සං කියල කියන්නෙ. බුදු රජාණන් වහන්සේ උතුම් බුද්ධත්වයට පත්වී පිරිනිවන් පානා තෙක් වසර 45 ක් ම ලෝකයාට දේශනා කළේ සං ගැනයි. එය සංදේශනාවයි. සංගායනාවයි.

සං
දැකගන්නා ආකාරයත් (සං දිටිඨිකෝ) සංවර වීමත් (ශිල) සංසිඳවීමත් (සමාධි) සංමා හෙවත් සම්මා වීමත් (පඥා) කළ යුතු බව, කළ හැකි බව බුදුන් වහන්සේ පුහුදුන් සමාජයට පෙන්වා දුන් සේක. පුද්ගලයෙකු තුළ සං උපත ලබන ආකාරයත් (සමුදය) සං වලින් මිදී නිදහස් විය හැකි ආකාරයත් (සංමා වීම) ත්‍රිපිටකයේත් සියළු සුත්‍ර ධර්ම දේශනාවලත් සං විග්‍රහ කර විවරණය කර විභජනය කර පැහැදිලිව පිරිසිදුව දේශනා කළ සේක.

මෙය මනසක් ඇති මිනිසෙක් වී ඉපදී සිටින ඕනෑම කෙනෙකුට කළ හැකි දෙයකි. කළ නොහැකි දෙයක් බුදුන් වහන්සේ කිසි දිනෙක කිසිවෙකුට ප්‍රකාශ කර නොමැත.

අද සමාජයේ බොහෝ වියතුන් කියනු ලබන්නේ දැන් සංගායනාවක් කිරීමට සුදුසු කාලයක් බවයි. ඒත් සං නොදැක, සං නොදැන සංදේශනාවක් හෝ සංගායනාවක් කිරීමට මේ ලෝකයේ පමණක් නොව මේ සක්වළේ හෝ කිසිම පුද්ගලයෙකුට හැකියාවක් නොමැති බව අප දැනගත යුතුය. 

නිබ්බානගාමී මග දෙසන යතිවරයාණෝ

1014337_546741852051077_1888912415_n

නිවන දැනගැනීමට අපමණ මාර්ගයන් තිබෙන වර්තමානයේ නිවන දැකගැනීමට උපකාරීවන මගක් සොයාගැනීමට නොහැකිව සසරේ තව තවත් අතරමංව සැරිසරණ මිනිසුන්ට නිවන් දැකගැනීමට උපකාරී වන්නාවූ  සංදේශනාව, පටිච්ච සමුප්පාද ධර්මය, ද්වතාවය හා තිපරිවට්ටය යන බුද්ධ භාෂිතය පැහැදිලිවත් පිරිසිදුවත් දේශනා කරන බුද්ධ ශ්‍රාවකයන් වහන්සේ කෙනකු වන අතිපූජ්‍ය මීවනපලානේ සිරි ධම්මාලංකාර ස්වාමීන් වහන්සේගේ ධර්ම දේශනා ඇසුරෙන් ප්‍රකාශිත මෙම බ්ලොගයේ දහම් කරුණු නිවන් පිණිසම උපකාරී වේවා !  සුතමයේ ඥාණයත් පරතෝඝෝෂක ප්‍රත්‍යයත් ලැබීමට සද්ධා විරිය ලැබේවා !  

Thursday, December 19, 2013

සිරි දහම - අලෝකෝ උදපාදි

අලෝකෝ උදපාදි

මෙම බ්ලොග් ශීර්ෂයේ  “අලෝකෝ උදපාදි” යන්න මුලින්ම තේරුම් ගනිමු.
මෙය ශුද්ධ මාගධී වචනයකි. එය “ආලෝකෝ” නොව “අලෝකෝ” වේ. 
අලෝක තේරුම් ගන්නට කළින් ලෝක යන වචනය තේරුම් ගත යුතුය.
ලෝක යනු අඳුරයි. අපි ඉපදෙමින් මැරෙමින් අනන්ත වූ සංසාරයක ලෝකය
යැයි කියමින් සැරිසරන්නේ අඳුරකයි. ඒ අනුව මේ ලෝක තත්ත්වයෙන්
අලෝක තත්ත්වයට පත්වීය යුතුය. උදපාදි යනු එම තත්ත්වය දැක පහදා
ගැනීමයි. සම්මත ව්‍යවහාරයේ ද ආලෝකය යනු අඳුර නැති යන අර්ථයයි.

 සිරි දහම

සිරි
යනු අතීතයේ බුදු රජාණන් වහන්සේ හැඳින්වීමට භාවිතා කළ වචනයකි.
සිරි මහ බෝධිය යනු බුදු රජාණන් වහන්සේට උතුම් බුද්ධත්වයට පත්වන්නට
උපකාරී වූ බෝධියයි.
සිරි දළදා යනු බුදුන් වහන්සේගේ දන්ත ධාතූන් වහන්සේයි.
සිරි සද්ධර්මය යනු බුදු පියාණන් වහන්සේ විසින් දෙව් මිනිසුන්ට නිවන් දැකගැනීමට
උපකාරීවන ආකාරයට දේශනා කරන ලද ධර්මයයි.
තවද සිරි යන වචනය යෙදූ දැනුදු භාවිතයේ පවතින වචන රාශියක් ඇත. සමාජ
භාවිතයේ යහපත් හොඳ යන අර්ථය දැක්වීම සඳහා සිරි යන වචනය යෙදූ පදවැල්
වර්තමාන සිංහල භාෂාවේ දකින්නට ඇත. හෙළ මිනිසුනට නම් තැබීමේදී පවා
සිරිපාල, සිරිසේන, සිරියාවතී ආදී වශයෙන් සිරි භාවිතා කර ඇති බව දැකිය හැකිය.
සිරි ලංකාව (දැන් ශ්‍රී ලංකාව) යනු බුදුන් උපන් රටයි.

ඒ අනුව සිරි දහම අවබෝධ කරගෙන ඔබටත් අලෝකෝ උදපාදි වන්නට
සියළු ශක්තිය ලැබේවා ! ඒ සඳහා මෙම බ්ලොගය තුළින් මා ගන්නා වෙහෙස
යන්තමින් හෝ ඔබට උපකාරයක් වේ යැයි සිතමි. සංසාර රෝගයෙන් සුවපත්
වන්නට ඔබට උතුම් ධර්මාවබෝධය ලැබේවායි ඉත සිතින් අධිට්ඨාන කරමි.